مهداة إلى الدكتور يوسف بطرس غالى وزير المالية المصرى بمناسبة إقرار قانون الضرائب العقارية .. ولا عزاء للغلابة المطحونين
ملحوظة: القصيدة بالعامية المصرية
البلد دى مش بلدنا .. إحنا ساكنين بالإيجار
ولا عدش فيها أى حاجه تخصنا ..
لا البيوت اللى بنيناها بعرقنا ودمعنا ..
ولا حتى هدمتنا اللى بندارى وراها فقرنا
معدش شيء جوه البلد دى ملكنا
إحنا يادوب مستأجرين
لكل واحد مننا أربع حيطان
لازم يوَّرد فى الميعاد عنها الإيجار
قانون وماشى ع الصغار قبل الكبار!!
وإحنا غلابه ومقهورين
لكننا عند الحكومه دايماً مذنبين ..
ومن الحقوق اللى علينا دايماً هربانين ..
جعانين ما تشبع مننا بطون أو عنين
طماعين .. ومدكنين
تحت البلاطة فلوسنا دايماً متدارين
حكومتنا شايفانا كده ..
لكنها .. صعب حد يغشها
وعشان كده
قررت كل اللى هيأخر إيجاره ينطرد بره البلد
ما البلد دى مش بلدنا .. وإحنا ساكنين بالإيجار
*******************
انت ما بتملكش غير حبة هدوم
قُدام صحيح ..
لكنهم بيستروك .. فى الحر أو برد الشتا
أما الطعام ..
فبتحمده على أى حاجه لو تدوم!!
طول النهار شقيان ومتشوق لبيتك
أربع حيطان .. لكنهم جنه بناسهم أهل بيتك
وحتى لو من غير فلوس .. تبقى ملك لو جوه بيتك
بس القضية المشكلة
أن انت من يجى سنه
مديون بأجرة السكن
اللى بنيته على حسابك من سنين!!
علشان يضمك والعيال
وتعيشوا جواه مستورين
ملكك بأه ..
من غير ما حد يدق بابك
يطلب الأجرة فى بداية كل شهر
فجأه لقيت ..
أن انت لازم تدفع الإيجار فى ملكك!!
بالقانون ..
الأرض دى بتاعت البلد ..
والبلد من حقها .. تستفيد من أرضها
قررت هتلم م السكان إيجار على ملكهم!!
أصلها دى مش بلدنا .. وإحنا ساكنين بالإيجار
*******************
مش هاتدفع سيب مكانك للى يقدر
ما تقاوحش
حتى لو دبرت أجرة كام سنه
أكيد هاتيجى عليك سنه .. مش هاتقدر ع الإيجار
أوعى تقول: ملكى يا ناس أزاى عليه أدفع إيجار؟!
ده قانون وماشى ع الجميع
اللى بيملك عشه زى اللى بيملك ألف دار
ولاجل الحكومه تنبسط وتعيش
لازم بلدنا تضحى بحياة الولاد .. والأمهات ..
والصغار ويَّا الكبار!!
هى دى حقيقة اللى حاصل ..
هو ده الواقع .. وهو ده اللى صار
وإحنا غلابه .. وأغبيا
قدام حكومتنا الذكيه
(تاجر البندقيه) اللى متشوق للحم المديونين
قاعد ومستنى .. لحظة ما تدفعش الإيجار
راح تنطرد فوراً .. ويستأجر مكانك ناس كبار
ناس معاهم كل شيء .. بس مالهمش وطن
أصل وطنهم الفلوس .. والدولار هو السكن
مكان ما يعجبهم يعيشوا .. ويسكنوا .. ويتملكوا ..
مش بس أرضك والحيطان .. لأ كمان
حتى القمر بالليل .. ونور شموسك بالنهار!!
هو ده الواقع .. وهو ده اللى صار
كلنا هانسيب بيوتنا للى يقدر ع السداد
والبلد دى نسيبها لاصحابها الجداد
أصلها دى مش بلدنا
وإحنا ساكنين بالإيجار!!
الأربعاء يناير 22, 2014 11:32 pm من طرف بسمات دامعه
