ممكن رايكم ؟

السلام عليكم اخواتى المتحابون - عاملين ايه ؟ عندى مشكلة تعبانى اوى بس يا ريت ما تستهيفوهاش
اجيب لكم م الاخر
انا مش حاسه برمضان
معنديش الاحساس اللى كان عندى وانا صغيرة
كنت بحس برمضان ونفحاته قبليها بكام اسبوع
حتى الشعائر اللى كانت بتحسس الواحد بالشهر ده مش موجودة
القطايف والكنافة وورق رمضان اللى كنا بنقصه واحنا صغيرين قربت تنعدم
كنا بنتنافس واحنا صغيرين اكتر شارع يكون فيه ورق وزينا وفوانيس
انا حتى قلت لنفسى يا بت قومى كده وهاتى شويه ورق وقصقصى انتى والعيال يمكن تحسى بالدنيا والله حضرت كل حاجة وركنتها ولا عملت حاجة
حتى النفسية ما بقتش زى الاول
انا حاسة ان الموضوع مرتبط بعلاقتى مع ربنا اللى حاسة انها ااقل من زمااان
انا عوزاكم تقولو لى رايكم انتو عامليين زيى ولا انتم حاسين بيه ولا العيب ف اية بالظبط ؟

اه ه ه ه ه ه ه ه ه ه فكرتينى بموضوع كتبته زمان عن عدم احساسى بالعيد بس عارفه انتى السنه دى مش حاسه بيه عشان غيرتى المكان عارفه انا فكرت السنه دى اشترى لنفسى فانوس بس فانوس زى بتاع زمان ابو شمعه ولو ملقتش هتصرف وانا هستنى حد يشتريهولى ولا ايه انا الى لازم احب نفسى واحسسها برمضان انا هعمل الى عليا وهجمع العيال واعمل التزاويق والانوار اه والله انا فى مولد النبى اشتريت لنفسى عروسه المولد هو كده سعادتى محدش هيعملها غيرى طالما فى حدود الادب والطاعه ومش هخلى اى عوامل اخرى تكون السبب فى عدم احساسى باحلى مناسبه فى الدنيا وهى رمضان حبيبى بحبك يا رمضان اقصد يعنى شهر رمضان مش عم رمضان

وحشني بجد بجد
وماحدش سال فيه ياوحشين
معلش كنت مشغوله خالص كنا بنبيض الشقه عقبال عندكم جميعا والدنيا كانت هيصه ليصه
اما انا ياجنه زيك تمام ومش عارفه ليه النهارده طلعت مع اختي وشوفت الناس في الشوارع والفوانيس قولت ايه ده هو خلاص رمضان جيه وانا مش حاسه
المشكله مش في رمضان نفسه اللي مزعلني ان رمضان جيه وانا لسه انا مش عملت اي حاجه من اللي كنت بحلم بيه خالص ولا غيرت نور ولا عليت منها في علاقتها مع ربنا ولايام ديت انا واقعه خالص
بس انا بعمل كل سنه زي زرقاء بالظبط بظبط الشقه والشارع ووسط البيت تزاويق ونور بعمل جو مع نفسي بس فعلا السنه ديت اتليهيت جامد الله المستعان واللهم بلغنا رمضان لعلنا لسنا من اهله فاللهم بلغنا رمضان بقلوب طاهره نقيه تتقيك وتتقي حرماتك امين

مقصره معاكم انا عارفه بس انا بجد بقيت حتي القرايه بكسل اقراها الحمد الله
اسيبكم دلوقتي وباذن الله رمضان كريم عليكم وعلينا

السلام عليكم

مين قال اننا ممكن نستهيف الموضع ده

ده موضوع كبيييييييييييييييييييييير مش صغير

وعلى فكرة مش مرتبط برمضان بس ده اكبر من رمضان

فى رائى الموضوع منقسم لجزئين

الاول طبيعى وفطرى

لان زمان كنا اطفال والان احنا اغلبنا اباء وامهات

واكيد احاسيس الطفولة عامتا بتختلف وخاصا فى المناسبات زى " رمضان والعيد " كلنا زمان كنا بنشارك فى تزويق الشارع والعمارة قبل رمضان بشهر على الاقل ونستنى مدفع الفطار فى البلكونة او بنروح للمدفع نفسه ونشرب الشوربة واحنا بنتفرج على بوجى وطمطم ( بس الحقيقى مش المزور )وبعدها النينجاو بعدها بكار ونتخانق مع اخوانتا الكبار عشان هايزين يحولو على القناة التانية عشان برامج المنوعات ..ياااااه زمن
ونستنى فوازير زمان الجميلة مع الف ليلة وليلة ( الاشكيف و شاندو وماندو وريما ومشكاح مع فاطيما وكريمه حليمة ) .

اما الجزء التانى بقا انا بسميه "البركة "

اللى بتقل للاسف يوم عن اللى بعدة واصبحنا نحارب فى الدنيا وفى صراعات مع الفساد والغلاء والمشاكل الاجتماعية والامراض اللى اسطوطنت فينا ومكنش نسمع عنها زمان

وانا متاكد ان اطفال اليوم عمرهم ما بيعيشو اللحظات و الايام الجميلة اللى عشنها للاسف يعنى الشعور.

وانا عن نفسى عشان اعيش اللحظات الجميلة دى تانى واحس برمضان بفضل اسمع اغنية عبد المطلب ( رمضان جانا .. بالتصوير القديم )و اهو جيه يا ولاد و وحوى يا وحوى
وبدور على الحاجات الجميلة اللى كانت بتيجى زمان على اليو تيوب زى بوجى وطمطم و فطوطا و فوازير زمان


وعلى فكرة انت يا جنة فكرتى فى شىء عملى وجميل جدااا لما تجيبى الاولاد وتعملو الزينة وتعلقوها فى الشارع والعمارة ... ياريت تلحقى تعمليه وماتحرميش نفسك واولادك من لحظات جميلة عشان يلاقو هما كمان ذكريات جميلية يعيشوها لما يكبرو زينا لانى اخشى ان الجيل ده ما يكنش عنده ذكريات او احاسيس جميلة يعيشها لما يكبر زينا


الموضوع كبييير مش صغير وفلسفى ومعقد مش بسيط

اسيبكم تعيشو شوية مع زمان وذكريات رمضان

رمضان جانا

https://www.youtube.com/watch?v=q6oF0fFGQHc


اهو جيه يا ولاد

https://www.youtube.com/watch?v=-RvOKDz-c7k&feature=related


وحوى يا وحوى

https://www.youtube.com/watch?v=LASqYs7mBOU&feature=related

جزاكم الله خيرا يا استاذ غاوى
بصراحه فكرتنا بحاجات
انا عن نفسى غمضت عينى وسمعت الاغانى دى حسيت باحساس ميتوصفش
جربوا كده
على فكرة يا جنة انا كانت مسيطرة عليا الاحاسيس دى برضه بس حاولت اخرج منها
برضه بالزينه والفوانيس
ربنا يعينك وتسترجعى الذكريات الجميلة بتاعت زمان
وان شاء الله تتعوض لما تستغلى رمضان احسن استغلال
ربنا يتقبل منك ان شاء الله

منورانا يا نور والله ومبروك بياض البيت
ياترى بيضته لون ايه
عقبال بياض شقتك يا قمر

اقتباس :

انتى السنه دى مش حاسه بيه عشان غيرتى المكان

تتصورى يا زرقاء ممكن يكون ده السبب وانا اساسا نقلت ف مكان بيستخسر اصحابه يقولو كلمة جووووووون ف اهم المباريات لانهم بيعتبروا الهدوء جزء من الرقى يا مسهل ادعولى بالتيسير ف بيعها

اقتباس :

ربنا يكرمك يا جنة ويكون رمضان السنادى أحلى رمضان ويكون مليان طاعة وفرحة اللهم امين

ويكرمك يا ام مريم وشكرا ع الدعوة الجميلة دى ويا ترى اشتريتى فانوس لمريومة ولا لا ؟

اقتباس :

معلش كنت مشغوله خالص كنا بنبيض الشقه عقبال عندكم جميعا

مبروك يا جميل وعقبال دهان شقتك بس ابقى قولى لى اجيب لك واحد ممتاز يدهنهالك بصراحه مخلى شقتى تحفة

اقتباس :

مين قال اننا ممكن نستهيف الموضع ده

ده موضوع كبيييييييييييييييييييييير مش صغير

ربنا يكرمك ع الاهتمام ده لانى كنت حاسه ان الناس هتقرا الموضوع ومتردش بس هو كان مضايقنى بجد بس عاوزة اقولك على حاجة ان احنا دلوقت اللى بندور ع الحاجات اللى تحسسنا برمضان لكن زمان الامور كانت ماشية تلقائى تبقى ماشى ف الشارع تشوف التزاويق وبتاع القطايف والكنافةحاجات طبيعية لكن دلوقت لما تييجى تدور ع الحاجات دى تلاقى ادامك بدائل تانية من نساء كاسيات عاريات وحاجات تثير الاشمئزاز تنسيك طعم رمضان وربنا يهدى

اقتباس :

eربنا يعينك وتسترجعى الذكريات الجميلة بتاعت زمان
وان شاء الله تتعوض لما تستغلى رمضان احسن استغلال
ربنا يتقبل منك ان شاء الله

[/quote]
يا رب يا ام روان ورمضان اللى بعده يكون معاكى احلى روان ف الدنيا وربنا يباركلك ف حمزة ومتنسيش فانوسه متضحكوش ع العيال

اقتباس :

ويكرمك يا ام مريم وشكرا ع الدعوة الجميلة دى ويا ترى اشتريتى فانوس لمريومة ولا لا ؟

لا والله يا جنة الحاجات دى مش موجوده هنا بيقولوا عليها بدعة عشان كده منعينها ومحدش جاى من مصر نقله يجيبلنا معاه يلا يبقى ليها عندنا فانوس