إذا كان الطائر اللي بيصحي بدري هو اللي بيلحق الدود قبل غيره سنجد أن الفار اللي بيصحي متأخر هو اللي بيعرف المصيدة محطوطة فين
بس ده مايمنعش إن الجون بيجيبه لعيب بس البطولة بيجيبها فريق
وعشان كده باسأل ليه بيحطوا تحت الكراسي في الطيارات عوامات مش براشوتات؟، .
لو ماكانوش اخترعوا الكهربا كان زمانَّا دلوقتي بنتفرج علي التليفزيون علي أضواء الشموع!
بالمناسبة ليه بندفع معونة الشتا في الصيف؟
طيب لو واحد محكوم عليه بالإعدام وقبل الإعدام بنص ساعة شنق نفسه بمعرفته.. هل يعتبر مات منتحراً؟
طيبب إيه اللي المفروض يعمله الواحد علشان لما يتقتل يتقال اغتالوه بدل لقي مصرعه
طيب ليه الفقر لازم يكون «مدقع» والثراء لازم يكون «فاحش» والتمثيل لازم يكون «مشرف» والظلام لازم يكون «دامس»؟
وإيه المشكلة لما يختلط الحابل بالنابل؟
وإذا كان اللي مايقدرش يشوف أعمي واللي مايقدرش يتكلم أخرس واللي مايقدرش يسمع أطرش طيب اللي ما يقدرش يشم إيه؟
وليه الناس فاكرة الموت مابيجيش غير للناس البعيدة بس؟
وإذا كانت راقصة الباليه «باليرينا» طيب ما هو اسم راقص الباليه؟
طيب الحمار الوحشي أبيض متخطط بأسود ولا أسود متخطط بأبيض؟
وليه الناس بتفرح إنها اشترت عربية جديدة فيها عداد سرعة لحد 220 كيلومتراً بينما أقصي سرعة مسموح بها في أي حتة في مصر 100كيلو بس؟
طيب هل هييجي يوم نندم فيه علي كميات الملح اللي رشيناها علي العرسان في الزفة؟
وإذا افترضنا إن الناموس بيخاف من عربية الناموس زي ما بنخاف من عربية الدورية الراكبة هل الناموس بيرمي المخدرات اللي معاه لو شاف عربية الناموس جاية عليه؟
طيب إزاي بتصدق إن فيه ملايين النجوم في السما وإنت عمرك ما عديتها بينما لو حد قالك فيه بقعة علي هدومك مابتصدقش غير لما تشوفها بنفسك؟
طيب إذا كانت الكلا ب بتتضايق لما حد ينفخ في وشها شوية هوا ..ليه لما بيركبوا العربية بيطلعوا دماغهم من الشباك؟
طيب إزاي الواحد ممكن يعرف إن إزازة الحبر السري فضيت؟طيب لو حاولت تسقط في الأمتحان لأي سبب ولقيت نفسك ناجح في آخر السنة هل هتعتبر نفسك نجحت ولا فشلت؟
وهل الأشخاص النباتيين بيشربوا نسكافيه منزوع الكافيين؟
طيب الصوت اللي بيفكر وبيتكلم في دماغك لو سمعته في أي حتة تانية هتقدر تتعرف عليه؟.
من كتاب رصف مصر
الأربعاء يناير 22, 2014 11:32 pm من طرف بسمات دامعه
