يالا نصحى

اقتباس :

كل شهر هنعمل الاستفتاء اللى حواء كانت بتعمله احسن موضوع وانشط عضو
وكمان هنحط العضو الكسلان

عثل عثل فكرة جميلة للصحيان

فين غاوى زماننننننننننننننننن فعلا الجواز بينيم الناس evil:

حتى نور من ساعة مبيضو الشقة محدش بيشوفها :

ينهار ابيض على التدبيسة

هى القرعة دى ما كنش فيها غيرى ولا ايييييه


المهم

انا والله اللى واخدنى الايام دى الشغل

نظام الشغل الجديد اللى شغالين بيه الايام دى يوم بيوم

كان الاول شغل عليك بقا برحتك خلصو انشاله يتراكم عليك شهر وفعلا كان بيجى ايام بنطحن فيها سهر

من ساعت ما عملنا سيستم " برنامج محاسبى بيربط الشركة كلها عن طريق النت " ولازم نشتغل بوم بيوم وبقيت ساعات العمل ال 8 يا دوبك بتقضى بالعافية

وفعلا مش بلحق اخد نفسى وبحاول بقدر الامكان اتصفح المواقع واشوف الاخبار وادخل المنتدى برضه واساهم بقدر الامكان

وبالنسبة للجواز اللى بينيم كان الاول بدخل نت بالليل بعد الشغل كنت ببقى فاضى بس الان طبعا المشاغل فعلا اذدادت جدا ما بين حق البيت والزيارات والواجبات والوقت بيجرى زى الصاروخ

المهم ماطولش عليكم .. قولو طول ...

الفكرة عجبانى جدا وكنت ناوى اساهم من غير تدبيس بس انتم حظكم جميل جدااا

لان اليوم الخميس وانا مسافر يوم السبت مصيف .. اه مصيف فى شعر 9 ايه يعنى يجوز

وطبعا قاعد اسبوع وراجع فبعد اذنكم هاجل بس الموضوع ده لمدة اسبوع ولما ارجع باذن الله نشوف الحكاية دى

طاب مسائكم

اه شكل استاذ غاوى هيفلسع
طيب على الاقل اعزم علينا بالمصيف
على العموم تروح وترجع بالسلامه ان شاء الله حضرتك والاسرة الكريمة

طيب دلوقتى نخلى حد ياخد الاسبوعين دول لحد رجوغ اخونا غاوى بالسلامه ولا نستنى اسبوع وهو يعوض الاسبوع اللى غابه
ايه رايكم

زى ما تشوفوا انا معاكم فى كل الأحوال مدام مش هتدبسونى

انتو صحيتو ونمتو بسرعه ليه كده ؟؟؟؟؟؟؟؟

انا بقى مش بحب كده ان الواحد يتشجع لحاجة وبعد كدة ينسى

انا جيت وشوفت الفكره بس معلش اتشغلت شويه باول اسبوع دراسه
بس معاكم باذن الله وموافقه علي التدبيسه ومممكن تعتبروني من النهارده انا اول المتدبسين لغايه ما اخوانا غاوي يرجع انا شوفت الموضوع من فتره واول ماشوفت التدبيسه ككنت عندي مشروع عايزه اعرضه عليكم
وبجد بجد بجد هتنسوا نفسكم معاه زي ما انا نسيت نفسي لمده خمس أيام عشتهم في اسكندريه مع اجمل ايام عمري في مشروع اجيال النهضه

تحبوا تبقوا معانا في اجيال النهضه تحبوا تشاركوا معانا وتبقوا من احد مؤسسي اجيال النهضه

هحاول كل مره اعرضلكم بعض المشاهد واحكيلكم عن الحلم اللي حلموا الف شاب في المعسكر اجيال النهضه وكمان ممكن ادعملكم الموضوع فيديو وكمان صور بس لما استاذن واشوف هل ينفع ولا لا بس اعتقد انه ينفع لان الفيس بوك مليان بفكره الموضوع

هاجي في رد تاني اشرحلكم التدبيسه بتاعتي واتمني من ربنا حتي لو مش كتب ليا الاستمرار فيها لعل بشرحي للفكره وتدعيمي ليها علي النت لعلي اخذ الاجر بمن يشتغل فيها انا اشتغلت في جزء من الفكره فتره وباذن الله بحاول ارجع استكمل تاني بعد المعسكر بس ادعولي معاكم ان ربنا يكتبلي الصالح ويهدي الي قلبي ويصلح لي عملي ويبعد عني شيطان نفسي وشياطين الانس اللهم امين

بس بجد بجد مفتقداكم بس انا كنت شكلي زهقت من النت ووصلت لدرجه اني افتحه وافضل مبلمه ومش عارفه اعمل ايه ولا اقرأ ايه ولا اكتب ايه مش عارفه كان مالي الحمد الله علي كل حال معلش صدعتكم ولي مشاركه تاني بل مشاركات باذن الله بس انظم نفسي والفكره واعرضها بشكل منظم علشان توصل لقلوبكم قبل عقولكم

سلام مؤقت

اقتباس :

انتو صحيتو ونمتو بسرعه ليه كده

اقتباس :

انا بقى مش بحب كده ان الواحد يتشجع لحاجة وبعد كدة ينسى

يا جماعه احنا كنا منتظرين غاوى جنة

طبعا يا نور الله تقدرى تبدائ وشوقتينا للمشروع بتاعتك وفى الانتظار

السلام عليكم ورحمه الله وبركاته

بصوا انا من حوالي سنتين اشتركت في جمعيه صناع الحياه وكان شغلي الفعلي معاهم في مشروع اسمه مشروع انسان فكره المشروع انهم بيشوفوا الناس المتسربين من المدارس وبدل ما يقدموا معونه شهريه للاسره لا يشترطوا علي الاسره ترجع الطفل المدرسه في نظير مشروع صغير بيتعمل للاسره والمشروع ده بيبقي مدروس كويس من اعضاء الجمعيه بيكونوا فريق بحث عن المتسربين والاسر الفقيره اللي تحت خط الفقر وكمان فريق تاني لدراسات الجدوي وفريق اخر للتسويق وفريق اخر لدعم الاسره تربويا ودينيا بمعني اخر الاسره بتتغطي من كل الجوانب ماديا ومعنويا وفي في الاخر حاجه اسمها حضانه لاسره لمده سنه تقريبا بعد مايتعمل المشروع بيتابعوا الاسره ونجاح المشروع وبكده رجعوا طفل متسرب من التعليم يبقوا خدوا الجانب التعليمي وكمان نموا الاسره ديت من ناحيه الفقر ومش بالمساعده الماديه لا بانهم يشتغلوا هما ويدوقوا طعم الربح الحلال

وبجد كان اجمل احساس وانت بتدخل علي الاسر ديت وهي تدعيلك بان ربنا يكرمك ويسترك ويديلك اللي تتمناه كانت مشاعر جميله عشتها فتره وسبت الجمعيه فتره لما بصراحه شوفت حبه سلبيات كده انا مش كنت في الفتره ديت قادره اعديها لاني لي طبيعه شخصيه خاصه شويه ومش قدرت اعديها وربنا كتب لي اني اروح معسكر اجيال النهضه بتاع اسكندريه ده وخدت نيه ان اتعلم منه واني ارجع وافيد بيه نفسي واللي حوالي وبجد كان اجمل خمس ايام برغم كام مشكله اعترضتني هناك و زعلت من ناس غاليين علي هناك بس رجعت بمجموعه من التجارب ومجموعه من الرؤي خلتني اقول الحمد الله


فكره بقي مشروع اجيال النهضه او مؤسسه اجيال النهضه هي المؤسسه عباره عن تجميع لشغل 7 سنوات من التنميه وكان المعسكر يضم اكثر من الف شاب وشابه تقريبا 1200 وبجد الحمد الله كانت الغالبيه العظمي منهم ناس علي خلق ودين واحترام والواحد علي الجانب الشخصي استفاد منهم كلهم عناصر ماشاء الله عليهم استفدنا منهم كتير وكنت بجد فخوره ان دول شباب مصر وحسيت بنعمه كبيره اوي وانا وسطيهم وحسيت بامان كبير اوي كانوا خمس ايام مش فيهم نوم تقريبا الا القليل بس مش حسيت باني مش بنام علي عكس دلوقتي خالص بنام كتير وكاني مش نمت خالص سبحان الله يمكن علشان فعلا عشنا وقت منظم الي حد ما ومرتب وديت كانت اكبر استفاده انهم كانوا مرتبين ورقهم وقولت ليه مش نتعلم نترب ورقنا كده ويبقي اهم اولوياتنا صلاه الفجر

كان في المعسكر بتاعنا احنا " معسكر محمد فريد " اصل اقولكم هما المعسكر مقسوم 4 معسكرات كل معسكر في مجموعه مش الشاليهات وكان سعه كل معسكر تقريبا 250 فرد واحنا بقي معسكرنا كان اسمه محمد فريد تحت قياده الدكتور احمد سالم وهو شاب بس ربنا يباركله في عمره يارب في طاعته كان اهم حاجه يصحونا نصلي الفجر وايه بقي اجمل حاجه لما تشوف المعسكر اغلبه صاحي الفجر والرجال امام واحنا في الخلف في ارضيه المعسكر اللي نجيله وبعدها خاطره صغيره وبعدها طابور الصباح ونطلع الشباب امامنا واحنا وراهم الي ان نجتمع الاربع معسكرات " محمد فريد ، سعد زغلول ، مصطفي كامل ، احمد عرابي " نروح الصاله بتاعت التدريبات الرياضيه الشباب في صاله منفصله عن البنات بمدربين رجاله واحنا مدربين بنات ونعمل التدريبات خفيفه الصبح ونرجع تاني في نظام نفطر وبعدها نروح القاعه بتاعت المؤتمرات الكبيره اللي بنتقابل فيها كلنا الاربع معسكرات ناخد دورات عن العمل التطوعي وفكره المؤسسه وناخد راحه وبعدها دوره تاني وبعدها نروح الغدا كل معسكر علي حدي وبعدها ترفيه مره بحر ومااجمل البحر رغم انه كان شاطئ مش حلو بس بجد منظر المياه اجمل منظر شوفته في عمري وهي المياه بتعدي موجه وري موجه وبعدها في حفله سمر اما مجمعه كل المعسكرات وديت كانت اول يوم وكانت اخر يوم بردوا اما باقي الايام كانت كل معسكر علي حدي وكانت فعلا اكبر حاجه عجباني انها ترفيه في طاعه ربنا رغم تواجد بنات وشباب مع بعض الا انهم في ضوابط شرعيه بتحكمهم وديت كانت اكبر شهاده طلعنا بيها من المعسكر اننا اول معسكر مختلط ونقدم نموذج محترم لعلاقه البنات بالشباب والحمد الله وده كان بفضل الاعضاء المحترمين وكمان القياده


في مره كان في الحفله مصطفي محمود وديت كانت اكبر مفاجاه واخر يوم كان في يحيي حوا وديت بردوا كان اجمل واجمل اوي وكنت مبسوطه كتير وكمان كان في حمزه مش عارفه ايه اصلي بصراحه مش بسمعله بس كان يعني بالنسبه للشباب كانوا مبسوطين بيهم اوي اما انا كنت مبسوطه بمصطفي محمود وكمان واحد تاني اسمه احمد مش مشهور بالنسبالي وكمان طبعا يحيي حوا هبقي انزلكم بعض الفيدوهات وبعض الصور بس لما اجيبهم من علي الموبيلات بتاع اصحابنا



ده كله كان وصف سريع للخمس ايام ومدي المتعه الي كانت فيهم رغم مدي التعب اللي كان فيهم



فكره المؤسسه كانت تضم اربع مشاريع

الاول : مشروع انسان اللي شرحته فوق

الثاني : مشروع منتديات صحيه وهي الهدف الاكبر ليها التوعيه من الامراض المعديه وغير المعديه كمان وشعارهم دعونا نذهب اليهم وهم اصحاء قبل ان يأتونا مرضي

الثالث : مشروع حماه المستقبل وكلكم تقريبا عرفينه عن توعيه للتدخين وهدفهم دلوقتي انهم يكرهوا الجيل الجديد في التدخين ويوعوه قبل ما يدخنوا اساسا

الرابع : مشروع قريتنا وده الاجمل فيهم لانه بيستهدف قريه وينزلوا الشباب ويغطوها من كل المشاريع الثلاثه السابقه ويغيروا فيها وفي شبابها بشكل فعلي مش كلام وبس


اتمني مش اكون طولت عليكم وصدعتكم ولي راجعه اخري اليكم

جميلة اوى الحاجات دى انا عمرى ما اشتركت فى ى معسكرات قبل كده بس شوقتينى لاقضى اوقات كهذة ولكن هيهات ان زوجى يسمح لى وكمان نور الهدى ربطتنى اوى
يالا الحمد لله
بس الموضوع عجبنى اوى

يااااااااااااااااااااااااااه يا نور فكرتينى بالمعسكر اللى حضرته فى اسكندرية برضه بس من حوالى 4 او 5 سنين
وكان بنات بس كان فيه حاجات حلوة برضه
وفكرتينى كمان بايام الجامعه ياترى فاكرة يا نور وام مريم برضه فاكرة ايام الجامعه ؟؟
ياااااااااااااااااااااااه كانت احلى ايام
انتى شوقتينى لعرض البرنامج بالتفاصيل المملة لو سمحت كاننا كنا معاكى
بس عايزين بجانب كده تقولى لنا احنا ممكن نعمل ايه علشان ننفذ بعض اللى انتى بتقوليه
واعملى حساب ان انا وام مريم ونور الجنة بعيد عن مصر ومش بنقدر نعمل الحاجات دى
وفى نفس الوقت عايزين نشارك معاكم بحاجة فى النهضة دى نقابل بيها ربنا يوم القيامه
ياترى ايه راى ام مريم انتى تقدرى تعملى حاجة عندك فى السعودية
احنا هنا فى الكويت غير مسموح لغير اهل البلد
فى انتظار المزيد يا نور الله ومتاخريشعلين لو سمحت

بمناسبه نور الهدي فكرتيني يانور الجنه ان اقولكم علي شخصيات كانت معانا في معسكرنا احنا
شيخ كبير هو وزوجته معانا مشتركين وسبحان الله اول ناس كنا بنلاقيهم قاعدين مستنين صلاه الفجر هو وزوجته هو مسن بتاع حاجه وستين وسبعين بس بجد كان ماشاء الله عليه وزوجته كمان ساعتها قالت تعليق من قلبها قالت انا لما شوفتكم حسيت ان لسه الدنيا حلوه بجد كان احساس جميل اوي
وكمان الاجمل كان في شباب متزوجين هما والنونه بتاعتهم وزوجاتهم في المعسكر بيشتغلوا في المشروع بنفس الهدف ونفس الروح والاحساس

وفي دوره من الدورات المدرب قال غمضوا عنيكم لمده ثواني واتخيلوا حالكم بعد عشر سنوات واحلموا حلم لنفسكم وحلم للمؤسسه

انا بصراحه حلمت في الوقت ده ان اكون متزوجه وفي معسكر تاني بس معاي ولادي واكبرهم نور ابني واقف علي المنصه عنده عشر سنين بيعلم ناس خبراته في العمل التطوعي والتزامه وحبه لخدمه الناس
ياجدعان هو قال احلموا واعتقد ان الحلم مش ممنوع ولا ايه ؟؟؟؟؟؟؟؟

اقتباس :

ياترى ايه راى ام مريم انتى تقدرى تعملى حاجة عندك فى السعودية

للأسف السعودية غير مصر خالص خالص حتى خروجنا أو أى عمل أو نشاط بيكون مننا فينا..

أقصى حاجة ممكن تتعمل انك تشتركى فى جمعية تحفيظ . ودى القائم عليها والمسؤول عنها سعوديات ومناهجها ودوراتها هما برضو اللى بيحددوها وليهم أراء متشدده كتير منها مثلا موضوع الصور والدباديب والنقاب والإسدال والإنشاد حتى لو بالدف وغيرها .. فالأحسن انك تقعدى فى البيت من الأول وكفايه عليكى الكام مصرية اللى بتشوفيهم

أيام الجامعة دى هى الأيام التى لا تنسى بحلوها وبمرها

اقتباس :

انا بصراحه حلمت في الوقت ده ان اكون متزوجه وفي معسكر تاني بس معاي ولادي واكبرهم نور ابني واقف علي المنصه عنده عشر سنين بيعلم ناس خبراته في العمل التطوعي والتزامه وحبه لخدمه الناس

ما شاء الله حلمك جميل جدا يا نور ربنا يارب يحققهولك بإذن الله

اقتباس :

للأسف السعودية غير مصر خالص خالص حتى خروجنا أو أى عمل أو نشاط بيكون مننا فينا..

أقصى حاجة ممكن تتعمل انك تشتركى فى جمعية تحفيظ . ودى القائم عليها والمسؤول عنها سعوديات ومناهجها ودوراتها هما برضو اللى بيحددوها وليهم أراء متشدده كتير منها مثلا موضوع الصور والدباديب والنقاب والإسدال والإنشاد حتى لو بالدف وغيرها .. فالأحسن انك تقعدى فى البيت من الأول وكفايه عليكى الكام مصرية اللى بتشوفيهم

الكويت كده برضه مينفعش اعمل اى حاجة واخرى برضه مكتب تحفيظ بس مش بيشددوا على النقاب ولا الاسدال

اقتباس :

أيام الجامعة دى هى الأيام التى لا تنسى بحلوها وبمرها

ياااااااااااااااااااااااااااااااه يا ام مريم ايام فعلا لا تنسى
انا دلوقتى بفتكر كل اللحظات اللى مرت علينا ايام الجامعه انا وانتى وبنت ابيها ونور الله ومودة وناس كتيييييييييييييييييييييييير دايما بفتكرهم وبدعيلهم
ربنا يجمعنا فى يوم لا ظل فيه الا ظله
بس بقى عشان انا هبكى دلوقتى

انا جيت معلش ياجماعه الجهاز اخويا بوظه امبارح بس الحمد الله تم الضحك علي الجهاز ومعالجته بشكل مبداي اصل جهازي خلاص بقي خرده