للاسف هذا ما اراه

معلش اعذرونى انا هتكلم المره دى بشويه من العاميه البسيطه بما انى بتكلم فى باب من الحياه فلازم يكون كلامى من الحياه اول حاجه مضيقانى لحظتم حضراتكم الفرق بين دور المسجد زمان ودور المسجد دلوقت بلاش ده لحظتم شكل المسجد زمااااااان وشكله دلوقت بلاش ده كمان شايفين دور المسجد عندنا ودور الكنيسه هى دى اول ظاهره دايمن بشوفها فى الشوارع ببص على اى كنيسه فى اى وقت القى فيها شباب وبنات واطفال اينعم ممكن يكون دورها ترفيهى شويه ومش فى كل الاوقات بيبقى دينى بس اهم ما فى الموضوع انهم عرفوا ازى يجمعوا ولادهم حواليهم فى قالب الدين تعالوا بقى نبص لينا احنا المساجد دورها نصلى والجامع يتقفل بسرعه جدا ده مره والله قفلوا على واحد بعد صلاه الفجر وعندنا بقى موانع زى الفل لدور المسجد يعنى ما فيش جلوس فى المسجد بعد الصلاه مفيش اى نشاط داخل المسجد من غير علم (امينه دولى ) ومفيش اعتكاف كمان الل بموافقه ومفيش ومفيش ده انا خايف يجى يوم يقولوا فيه لنا ان مفيش اصلا مساجد فالفرق دلوقتى بينا وبين النصارى اننا بنبعد وبنفرق وهما بيقربوا ويجمعوا ياجماعه ده هما من فهمهم الصحيح لدينا بقى عندهم يوم الجمعه نشاط زينا بالظبط يعنى احنا نقوم نصلى الجمعه وهما برده كل جمعه القى بنت او شاب صغير ماشى فى الشارع ومعاه حوالى 10 او 15 بنت وولد ضغيرين وريحين الكنيسه من بدرى واحنا للاسف المسجد دوره عندنا بقى ثااااانوى اوىىىى اللهم الل صلى واجرى واكتب الكتاب وعلى الجواب وحسبى الله ونعم الوكيل شوفولنا حل بقى فى ده

فى البدايه احييك على استخدامك للعاميه اخيرا على فكره بتقرب وجهه النظر بشكل اكبر وكمان بتساعدك تعبر بشكل اسهل
المهم الموضوع ده اثارته حواء من فتره وفعلا عندكم حق بجد دور المسجد بقه دور ثانوى يقتصر على العباده وياريت حتى بيتملى اثناء الصلوات بس السؤال هو الكلام ده فى مصر بس ولا كل الدول الاسلاميه

ياااااااه هو كان اسلوبى رخم للدرجه دى على قلبكم طيب كان حد نبهنى وقال تا تا تا وسيبنى مزهقكم من زمان على العموم انا اسف ياجماعه وبعدين هو انا اسال يابله زرقاء شوفلنا حل بقى تردى وتقولى هو الكلام ده فى مصر بس ولا كل الدول الاسلاميه؟ سوال بسوال

هه اشوفلك حل وماله
الحل عند امن الدوله تحب اوصفلك العنوان ولا انت اكيد عارفه

فعلا الموضوع دة كان مضايقنى قوى وطرحتة دور الكنيسة فعال عن دور الجامع للاسف على بلد اسلامى


ومين جاب سيرة البعبع احنا مالنا ومالة انا معرفكمش

عندي اقتراح بس عذرا انا في حاله مش عارفه اكتبلكم الاقتراح بشكل يوصلكم اللي في دماغي
اللهم يامقلب القلوب والابصار ثبت قلبي علي دينك
اللهم اعفو ا واصفح واغفر وتب وسامح وتجاوز اللهم عن ذنبي امين

الحقينا بيه ياابله حفيده يسر الله امرك \ انا ماجبتش سيره امن الدوله انا قلت (امينه دوولى) وماتخافيش ياابله حواء لو اتقفشت مش هعترف عليكى ولا هقول انك مديره منتدانا ولا اى حاجه\ ايوه يازرقاء عارف مكانها كويس وغرفها كمان لانى نزلت ضيف عندهم يومين فى رابعه جامعه

يومين بس طب شئ جميل انك تعرف شئ عن كل شئ اهنيك بهذه التجربه ولو عايز اى تفاصيل عن حواء عشان متعترفش عنها انا مستعده

تجربه والله فعلا تجربه ربنا ما يوعد حد ويجربها بس الحمد لله براءه ده حضرتك بتعزى حوااااء اوووى ربنا يرزقنا الاخلاص

السلام عليكم ورحمه الله وبركاته
بصوا ياجماعه لو قعدنا ننادي باحياء دور المسجد من هنا للصبح مش هيتنفذ لان دي سياسه هما عايزينها وانه بسببها يطلع شباب مفكك هش ماعندوش روح الشجاعه والمبادره ولا اي حاجه

فكانت اقتراحي انه احنا مش ننغلق علي المسجد بشكله الموجود حاليا يعني اكيد ايام رسول الله مش كان المسجد شكله كده يعني احنا ممكن نخلي من بيوتنا ونوادينا وجمعياتنا الخيريه مسجدا يعني اقصدبشكل اخر اننا نقوم بالدور الذي من الفترض ان يكون دور المسجد بس في اماكن اخري بعيد عن اعين من اراد اخماد دور المسجد الحقيقي لازما يبعي عندنا سياسه عدم الاستسلام للامر الواقع

هلاقي اللي يرد علي ما الاخوان بيقوموا بنشاطات اجتماعيه في اماكن متعدده بس انا مش وجه نظري بردوا النشاطات الاجتماعيه يعني علشان اوضح اكتر اللي بيدور في دماغي

مثال الجمعيات الخيريه بتعمل اه اعمال خيريه ويمكن كتير بس مش بشكل متكامل يعني هتلاقي الجمعيات اللي بتحفظ القران وبس واللي بيعمل اعمال تنمويه ومشروعات وبس واللي واللي
ايه بقي المانع من واحد او بالاصح مجموعه تاخذ علي عاتقها احياء دور المسجد بس بشكل بديل في اماكن اخري مثال مثلا زي جمعيه صناع الحياه بتعمل حاجات كتير حلوه بس ينقصها توازن الاختلاط بها واتزانه رغم انه شريحه كبيره ومتنوعهه مشتركه بها يعني مثال بالجمعيه انا اعمل تحفيظ قران وكمان عياده مريض وكمان تنميه بشريه ولياقه بدنيه وفكريه يعني نفس الدور اللي بيقوم بيه المسجد بس بشكل رسمي دي حاجه وكمان مخفي او تحت ستار الجمعيات اوالنوادي او او او اتمني يكون وضحت فكرتي

باختصار : استغلال الاماكن الشرعيه بالنسبه للامن وجعلها بمسابه المسجد الذي كان بايام رسول الله واحياء دوره من جديد "هي عايزه رجال ياخذوا علي عاتقهم المسئوليه ويضعوه امام اعينهم هدفا ونيه لاحياء ماكان يعمله المسجد من ادوار حقيقيه"
ياريت اسمع منكم رايكم وهل هذا ضربا من الا حلام