شافنى ومعجبتوش

يلا يا بنتي جهزي نفسك عشان بكره الساعه 8 جاي عريس يتفرج عليكي!!!!!!!!!!

تصوروا إن الجمله دي فيه امهات بتقولها فعلا

جمله بترخص اى بنت!
عجبته هيشيل
معجبتوش هيكبر
ولو مدخلتش مزاجه يدور علي غيرها ما هو مش خسران حاجه!

وفى بعض الارياف العريس يشوف العروسة ولو عجبتة يحط حاجة ذهب فى الصنية

معجبتهوش بيشرب الشاى ويمشى فى بنات كتير اعرفهم جلهم اكتئاب من كتر اللى جم شافوهم

وكرهوا الجواز والعرسان

يااااااااااااااااااه
للدرجة دي غلى الجواز ورخصت البنات!

العنوسه زادت ومش زادت وبس
لا
دي بقت الاساس والباقي اللي بيتجوز بيكون هو الاعجوبه في زمننا ده

*اسئلتي للبنات*

1_ترضي ان عريس ييجي يشوفك فى بيت اهلك وانتي عمرك ما شفتيه؟

2_وهيبقي احساسك ايه وهو هيشوفك لاول مره؟

3_ولو رفضك هتحسي بإيه؟

4_وياتري هتعيدي التجربه دي مره تانيه؟


*اسئلتي للشباب*

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي اى اساس تانى
2_هيكون احساسك ايه وانت رايح تشوف عروسه لاول مره؟

3 وايه احساسك لو العروسه عجبتك بس انت معجبتهاش
4-هل مقدر نفسك تقدير واقعى ولا شايف نفسك رشدى اباظه ويحيى شاهين

طب ايه المشكلة يا يمامه الموضوع بسيط واحد بيسمع عن واحدة كلام طيب وبعدين ييجى يشوفها ويشرب الشاى ويشوف فى الفه ولا لا وممكن الموضوع يمشى ويبقى زى الفل ويبقى انسان كويس واذا محصلش نصيب خلاص مخدش الموضوع على اعصابى ولمعلوماتك اغلب الزيجات بتبقى كده وناجحه ولا ايه يا يماااااااااااااامتى

خلينى وراكى خطوه خطوه لو فعلا الطريقه دى بترخص البنت زى ما بتقولى وان نفسيت البنات بتتعب لما يحصل كده ,طب تفتكرى ايه هيه الطريقه المناسبه للزواج ان هى تشوفه بره البيت سبع ,تمن ,عشرين مره ويتقابلوا بقى ويتكملوا فى التليفون ويدرسوا طبائع واخلاق بعض وكل ده طبعا من ورا الاهل وبعدين فى الاخر خالص يقول او تقول لالالالالالالا ده ما ينفعش اصله بخيل اصله غلس اصله اصله 000وفى الاخر يفترقوا 000كل اللى حصل ده مش بيرخص البنت قدام نفسها وقدام كل اللى عرف الحكايه والعريس نفسه كمان 0اختى فى الله زرقاء اليمامه ,انا ارى ان دخول الشاب من الباب وسط الاهل فيه احترام وغلاء كبير للبنت وحفظ لكرامتها وليس العكس فى وقت لا تعرفى فيه الحمل من الذئب,وبعد كده انا عايزه اى بنت قبل ما تقرر تشيل نفسها من مكان العروسه وتحط نفسها مكان الاهل بامانه وتفكر فى القرار السليم00000معلش طولت عليكم000

اسفه نسيت حمد الله على سلامت ردودك يا جنة الخلد واوعى تعمليها تانى واضح ان الموضوع استفزك وعجبك جدا علشان تردى000

الله يسلمك يا هنى بى ويسلم فمك اللى بينقط هنى ف هنى اصلنا عايزين نظبط دماغ اليمامة دى وتنسى انها ممكن تتجوز غير كده خلاص يا بنتى راح زمان قيس وليلى وروميو وجوليت ولا اييييييييييييييييييه

بالعكس يا زرقاء ده فيه تكريم للمرأة

اولا الزواج فيه تآلف ومحبة...وتذكري قول رسولنا الكريم صلى الله عليه وسلم
قال البخاري في صحيحه
قال الليث عن يحيى بن سعيد عن عمرة عن عائشة رضي الله عنها قالت
: سمعت النبي صلى الله عليه و سلم يقول ( الأرواح جنود مجندة فما تعارف منها ائتلف وما تناكر اختلف )

يعني كون الواحد شاف المرأة وهي شافته وحصل قبول او لا ده شئ طبيعي بيحصل اصلا مع الناس العادية وبعضها

ثانيا...الرجل عندما يذهب للبنت في بيتها فهي معززة مكرمة في مكانها سواء تم القبول او الرفض فهي في بيتها...لايضرها شئ لكن ياعيني ع الراجل الغلبان اللي يرجع مكسور الجناح علشان ما عجبش البنت هههههههه

ثالثا بالنسبة لموضوع العنوسة فهي اسباب كتيرة منها العري اللي بنشوفه في بناتنا دلوقتي واللي تلبس ع الموضة تتجوز اسرع.....ده غير الشباب اللي اغلبه بيبحث عن الجمال قبل الدين....ده غير الاهل الطماعين اللي بينهالوا ع العريس كانه وجبة يتم التهامه بطلباتهم التي لايقدر عليها شاب في مقتبل عمره وعايزين يخلوا البنت تعيش في مستوى معيشتهم لما كبروا....لدرجة لجأت عندها بعض الفتيات للزواج برجال يكبرونهم بالعشرين سنة لان معاه فلوس...وده طبعا سببه اننا ما بنعلمش ولادنا ان الامور دي تيجي بالصبر والتضحية...زي الولد برضوا يبقى متخرج ومستني ابوه يجوزه وهو لا يعلم ان المشكلة ليست مشكلة جواز وانما ما بعد الزواج وهي المسؤلية

وليا واحد صديق عمري دخل ع ناس علشان يخطب بنتهم....وقالهم ان امكانياته ضعيفة وانه مش هيجيب شبكة حتى الدبلتين اهلها ساعدوه في التجهيزات وبسبب رضى الاهل بنفس راضية وعن اقتناع ربنا رزقه دلوقتي بشغلانة ما شاء الله تخليه في خلال ست شهور يتجوز من بعد ما كان متفق ع سنتين...لانه برضا الزوجة بنصيبها يأتي الرزق

كل ده خلى الرجل يحرص في بحثه علشان ما يخدش مقلب بسبب اللي بيشوفه في الشارع
زائد انه قد يستغني عن واحدة كويسة بسبب ان اهلها طلباتهم تقيلة ويروح يدور ع واحدة تكاليفها ارخص....وبالتالي تحول الزواج مجرد تجارة والارخص يلحق

طبعا كل ده من بعد كلمة (الا من رحم ربي) لان فيه ناس كتير مش كده خالص لكن الظاهر قدامنا هو اللي بنشوفه علشان كده بدأنا نعود للزواج القديم بتاع ستي وستك
وده لان الواحد لو هيدور بالطريقة التقليدية بتاعت اليومين دول غالبا الاختيارات هتكون محدودة قدامه
لكن لما يبقى ليا اخت او ام او حتى قريبة من الاقارب يبحثوا لي عن المواصفات اللي بتمنها اكيد هيلاقوا ....خصوصا ان الرجل لا يرى من المرأة غير الظاهر لكن الستات عارفين بعضهم وعارفين مميزات وعيوب الاهل وهل اذا كانت تناسب صفات ابنهم ولا لأ

زائد اني واحد من الاشخاص الذين لا يعترفوا بأي علاقة حب قبل الخطوبة وان البنت اللي ترضى بهذه العلاقة من ورا اهلها لا أحترمها ولا اتزوجها واحب ان اللي اتزوجها اكون اول مرة اشوفها لكن طبعا اكون سألت عنها وعن أهلها

وليا تكملة بس جاتلي شغلانة مستعجلة هاروح اعملها ويا عالم اذا كنت هارجع اكمل ولا لأ
سلااااااااااااااااااااااااااااااااام

طيب انا بقى هعكس الموضوع لحضرتك يايمامه ايه الطريقه اللى شيفاها ينفع حضرتك تتزوجى بيها ؟؟؟؟؟؟ ردى انا بقى انا فى اعتقادى ان ممكن اخونا يشوف اختنا مثلا وهى خارجه من المسجد او مثلا يراها فى احد الافراح طبعا من بعيد لبعيد يعنى قصدى حفاظا على شعور البنت لانه اذا فعلا تقدم للبيت وما حصلش نصيب بيبقى احساس البنت وحش اووى وده للاسف بيحصل عند البنات اللى ينقصها ثقه فى الله وفى نفسها وتجهل معنى عجبا لامر المؤمن فان امره كل خير....... انما لو هى فتاه تعلم ان كل امر هو بيد الله فاقول ان افضلف طريقه هى انك فى بيتك ومن ارادك ياتى اليك (وادخلوا البيوت من ابوابها)ويجلسان بصبحه الاهل ويتناقشان فى ما ارادا بحدود الشرع وفى النهايه بالنسبه لمو ضوع انه يكلمها بره ويخرجوا ست سبع عشرين مره ويتصلوا ويتقابلوا وفى الاخر ما يحصلش نصيب اعترض بشده لان فى ذالك ترخيص لقدرك انتى احدى وصايا الحبيب قبل الممات اى انك تشغلين فكر النبى وهو فى اخر لحظاته فكيف ترخصين نفسك وانا اعتقد ان بديل تلك الفعله هى الخطبه والل لما جعات الخطبه هى امرا شرعى للتقارب بين الاذهان بين الطرفين بحدود الله وان لم يكن (نفشكل ) لان اصلا الخطوبه معموله لكده وغير كده انا عايز افكرك بحاجه ثقى فى الله وثقى فى ان (((((( الطيبون للطيبات)))))))

ياجماعة الموضوع مش زي ماوصلكم ولكن زرقاء بيتهيألي بتعترض ع نقطة معينة وهيا كون ان الراجل ييجي يشوف العروسة وبعد كده يبدي رأيه....بمعنى اصح ان القرار في ايده وان الست بتستنى رده

علشان كده حلا لهذا الموضوع بيلجأ اغلب الشباب الى النظر ورؤية البنت دون علمها حتى يرى منها ما يعجبه وهذا حلال شرعا وكمان علشان لايقوم بتجريح مشاعر البنت بالدخول ثم الرفض

فى ايه انتو بتعملوا كده ليه يعنى معقوله محدش فهم قصدى وكلوكو بتتكلموا وخلاص كل ده عشان مقلتش انه منقول اعتبرته ان وجهه نظرى ان لازم يكون فى قيس وليلى ومين قال اصلا انى بعترف بوجود حاجه اسمها حب هذه الايام
حاسه ان مفيش حد فهمنى غير ابو مالك وبعدين حصلت افاقه للهندسه وفهم بعد الشغلانه
انا اقصد ان الواحده تتشاف من غيرماتعرف عشان حافظ على شعورها ومفيش حد متزوج متعرضشى للموقف ده وزى ما كان برفض اكيد بيترفض ده لان القبول ده بايد ربنا مش بايد حد بس مش كل البنات نفسيتها قويه انا مش هتكلم عن نفسى لانى بتقبل ده جدا بتقبل نقدى ورفضى ده لانى واثقه من نفسى الحمد لله لكن فى بنات كتيير مبتتحملش ده
من كام يوم وانافىالمدرسه لقيت الداده هى سنها صغير 26 سنه عندها حاله اكتئاب ما عرفت السبب اتضح انه زياره زواج حكم عليها بالفشل طبعا ده خلانى بقيت ابص للبنات اللى معندهمش مؤهلات تخليهم واثقين فى نفسهم واقول ليه نجرحهم
تعبت من كتابه الموس حد يهادينى بكيبورد بقه

يعنى يا يمامة سبتى كل الردود ومسكتى ف السطرين بتوعى يا حول الله يا رب كلكو عليا ولا ااااااااااااايه؟؟؟؟؟؟؟؟؟؟

حاسه ان مفيش حد فهمنى غير ابو مالك طيب الحمد لله يازرقاء حد فهمك وياابله دى عشره وخناقات وردود ساخنه من زمان يعنى تفتكرى ممكن مش افهم قصدك بعد كل ده الحمد لله بس لى عتب عليكى صغير (ومين قال اصلا انى بعترف بوجود حاجه اسمها حب هذه الايام) ان اردتى الحب الحقيقى فاعطيه اولا احبى بكل ما تملكى فاجمل ما قد يكون هو الحب للحب لا لان انتظر من ياتى ليحبنى اشهد الله انى احببت زوجتى دون ان اعلم من ستكون احببت حبى لها وعطفى عليها وقسوتى ثم لينى احببت ضحكى وجدى وغضبى معها احببتها دون ان اعلم من ستكون لكنى احببتها لانى احب تلك الكلمه استبشرى خير اختنا فليس فى الكون ما يدعى الى الحبور ادام الله عليكى نعمت الثقه بالله ورزقكى بكيبورد تقر به عينك ويدك

شوفى يا اختى
انت استخدمتى لفظ انا مش موافقك عليه وهو سر رفضك للموضوع

اقتباس :

يا بنتي جهزي نفسك عشان بكره الساعه 8 جاي عريس يتفرج عليكي!!!!!!!!!!

مافيش حاجه اسمها يتفرج عليكى فى حاجه اسمها من حقه النظرة والقبول

والايجاب وده على فكرة من الطرفين يعنى برضه انت بتتفرجى عليه قصدى من حقك تشوفيه وترفضى او تقبلى مش صح ؟

مش برضه الاخت اللى بيرحلها عريس دى اوقات هو بيوافق وهى اللى مش بيعجبها ؟ مش صح


لكن اذا فى ام قالت هايجى واحد يتفرج عليكى يبقا معلش الخطاء هنا خطاء الام

مش العريس لانها استخدمت لفظ معين فعلا


ده غير ان العريس هو اللى جاى لحد عندك عشان يشوفك مش انت اللى بترحيلو وده فى تكريم واعلاء من قيمة المراة

ده كان اولا

ثانيا بقا

اقتباس :

1_ترضي تروح تتجوز بنت من غير ما تعرفها او لمجرد انها حلوه ومؤدبه واهلها طيبين وتلغي اى اساس تانى

طبعا ارضى ونص ..انت ماسبتيش حاجة كويسه الا وقلتيها بخلاف حاجه وحدها وهى اهمهم " التدين "

انا لما كنت بدور على عروسة حطيت معاير معينة وكانت مرتبه

يعنى فى اهم ثم مهم

كانت بدور على واحده طيوبه و هادية ورمانسية وطبعا جميلة جدا واهلها طيبين

بس كل ده كان داخل اطار الدين " الالتزام " يعنى لو كنت لاقين واحده فيها كل ده بس مش متدينة كان طبعا لا

اما بالنسبة لمووضوع ازاى اشوفها انا كنت بفضل طبعا انى اشوفها بره

يعنى واحد صاحبى او معرفه بيرشحلى واحده معينة بنت فلان مثلا بسال انا عنها وعن اهلها ثم بشوف بتروح الجامعة امتى او الشغل امتى وكده وبحاول اشوفها بره ( من غير ما تعرف هى ) عشان الاحراج لو محصلش قبول

ولو لاقيت فى قبول ومتوافر الشروط فيها الللى انا عايزها بتكل على الله وبكلم الوالد او الوسيط وبيقلهم على بيناتى وهما لو شافونى كويس او مفيش اعتراض بيقولو اتفضل عشان هى من حقها تشوفك برضه

شوفتى بقا ان البنت بتبقى معززة مكرمة والكل مستنى ردها ازاى ؟

اقتباس :

2_هيكون احساسك ايه وانت رايح تشوف عروسه لاول مره؟

عادى بس بصراحة بيبقا فيه رهبة او تخوف وده حصل فعلا لما رحت لزوجتى

بس الحمد لله قالتلى انها وافقت عليا من بعد ما مشيت عالطووول

اقتباس :

3 وايه احساسك لو العروسه عجبتك بس انت معجبتهاش

عادى حقها بس اكيد برضه بيكون الواحد صعبان عليه انها مثلا مابصتش لايجابيات اخرى

اقتباس :

4-هل مقدر نفسك تقدير واقعى ولا شايف نفسك رشدى اباظه ويحيى شاهين

لا طبعا رشدى اباظة ده مين ... اكبر شوية

ومحدش بيجوز غير مراته من الاخر

(

اقتباس :

من غير ما تعرف هى ) عشان الاحراج لو محصلش قبول

يارتنى كنت حطيته عنوان عشان كل الناس تفهم وجهه نظرى

ومحدش بيجوز غير مراته من الاخر احلى ما قيل

انا فرحانة فيكى يا يمامة الناس اتفقت معايا بشكل غير مقصود ان فى حب ونص وفى قيس وليلى وفى سميحة والشاطر حسن ههههههههههههههه بالشفا

اختى اليمامه اولا انا اعرف ان هذه وجهة نظر منقوله وان هذا ليس رايك000
اخى المهندس محمود000اشكرك على اعترافك بان الشاب الذى يتعامل مع فتاه بدون علم اهلها تسقط من نظره0
اخى بسمات 0000احب ان اوضح معنى الايه الكريمه "الطيبون للطيبات" انه امر من الله تعالى وانه يجب علينا ان نختار الزوج الصالح المتدين للمتدينه ووانه ليس معناها النصيب فقط 000
وبعد كده غاوى جنه قال نقطه مهمه جدا وهيه ان البنت ياما بترفض عرسان ومع ذلك بيتقدم لعروسه تانيه وتالته لحد ما ربنا يوفق ولا بيكتئب ولا حاجه00

ههههههههههههههههههههههههههههه
خناقات الزواج تاني
انا متفقه مع كلام اخي غاوي جدا وفعلا اخر كلمه اختصار لكل ده ماحدش بيجوز غير مراته بس عذرا ممكن اقول "ماحدش بيجوز غير جوزه " علشان انتوا ممكن تتجوزا اربعه
اما احنا خلاص هي مره وخلصت هههههههههههههههههههههههههههه
ياجماعه والله في خلاصه القول ده نصيب ولما بيجي بيجي باي طريقه بس المهم هي الطريقه دي ترضي ربنا ولا لا بس ودمتم بصحه وسعاده وخير

بالنسبالى الموضوع اسهل من كدا بكتير اترفضنا ورفضنا عن قناعة بنفسى وثقة فى الله انة سيعطينى ما كتب لى

لما رفضت كنت زعلانة لان القدامى هيحرج ولما اترفضت قلت لنفسى ملهوش فى الطيب نصيب عن قناعة ان نسب الجمال تتفاوت

وانا مع الرئى انة يشوفها من بعيد لبعيد

عارفين جوزى قبل ميشوفنى راح سئل عنى فى المدرسة وجة الضهر يسئل على ابويا ويقولة انا عاوز اشوفها انا طبعا وقفة ورا الباب وبتصنت على الراجل الغريب دة هو انا اية بضاعة جاى يتفرج عليها واقنعت نفسى ان انا الهعاين العريس دخلت وبكل ثقة فى نفسى سألنى وسألتة وسبت الرئى الاخير لوالدى عن قناعة لو هو النصيب ولا هشوف عيوبة ولا هيشوف عيوبى مكتوب راح جة مش هو دة المهم

وبعد شهر اتجوزنا

مسكين قصدى محظوظ

لية البنت بدل واثقة من نفسها تحسبها غلط

اقتباس :

خناقات الزواج تاني

هو كان فى خناقات زواج اولانى المواضيع اللى فااتت كانت خلاف مابين الذكور والاناث ملهاش علاقه بالجواز ولا هو فى علاقه وانا معرفهاش

شوفوا بقي يا جماعة سيبكم من الكلام ده كله
انا عايز اتجوزومش لاقي عروشة ومش عارف اعمل ايه
صلي علي النبي

يعنى انت حضرت الخناقه من اولها ولا نبداها من اول وجديد انت اصلا صاحب واجب فى الحاجات دى

هههههههههههههههه
عروشه ماهوفعلامش هتلاقي عروشه خالص كده
ربنا يهبك الزوجه الصالحه امين التي تكون من نفسك انت ممكن تستشير اخونا بسمات واخونا غاوي ماشاء الله عليهم دلوقتي هماخبره المنتدي

اقتباس :

ملهاش علاقه بالجواز ولا هو فى علاقه وانا معرفهاش

اكيد في علاقه
بصي يازرقاء ماشاء الله موضوع الجواز والحب اكثر المواضيع مشاركه وخناقات ميه ميه ده من وجه نظري اكتر حاجه تتفح علي المنتديات تلاقي الناس كلها بتتخانق قصدي بتتناقش