موضوع للمناقشه

بسم الله الرحمن الرحيم

السلام عليكم ورحمة الله وبركاته

إخواني أخواتي في الله و بعد :

وددت أن أطرح هذا الموضوع من مدة لكن مشاغل الحياة صرفتني عنه و ها أنا أطرحه لنتناقش حول هذا الموضوع و الذي هو :

ما جدوى التواجد و المشاركة في المنتديات ؟

أقول لمزيد من التوضيح :

بصفة أغلب أعضاء المنتدى موظفون اومتزوجون أو الاثنين معا

فهل أنت كموظف أو رب بيت ؟ .. ترى تواجدك في المنتديات أمر ذا أهمية أم هو من نوافل الأعمال ؟

، هل تعتقد أن التواجد و المشاركة مضيعة للوقت أو هو باب من أبواب الاستفادة و الإفادة ؟

، هل لديك وقت محدد لدخول المنتديات بنظام ، أم الأمر يأتي صدفة و دون سابق عزم ..؟


هل ترى أنك قدمت شيئا من خلال المنتديات تحتسب أجره أم لا ؟ ،

هل تعتقد أن عائق ضيق الوقت يؤثر على مساهمتك و تواجدك ؟

و غيرها من التساؤلات المتعلقة بالموضوع ....

أتمنى من الجميع أن يثري هذا النقاش المهم

، و أن يقول كل واحد فينا رأيه و وجهة نظره بكل صدق و نصح .

سأعود إن شاء الله.. و بارك الله في الجميع

فى الحقيقة يا اخت هنى انا دخلت المنتدى لثقتى الشديدة فى مؤسسة المنتدى وكمان العنوان بتاعه شجعنى اكتر وهو انا عايزه ايه غير التحاب ف الله والدليل على كده انا مدخلتش غيره - وعشان ابقى صريحة انا حاسة ان انا مش بفيد لكن طبعا بستفيد- لكن بامانة لما بدخل المنتدى وانا ورايه حاجه ببقى مضايقة وبحس ان وقتى بيضيع- عشان كده بحاول اتواجد فيه بعد نهاية اعمالى سواء ف العمل او ف المنزل لكن هل لارائى اى اهمية الله اعلم لكن انا متاكدة باهميتى ف التدريس والبيت

في الحقيقة ياأخت هني العملية بدأت من منتدى ابناء بني سويف ويرجع الفضل طبعا لحفيدة هي اللي عرفتني ع المنتدى وكنت في ذلك الوقت أعاني من فراغ كبير نظرا لعدم توافر فرصة عمل حينها ولسه متخرج وطبعا انا من النوع الذي لا يكون صداقات بسرعة كنوع من الحذر في انتقاء الاصدقاء خصوصا في هذا الزمن
طبعا كون الانسان وحيدا دون اصدقاء موجودين في بني سويف خصوصا ان جامعتي كانت في بورسعيد ونص حياتي كنت مقضيها في السعودية
فقلت شوف المنتدى ده يمكن تلاقي فيه ما ينقصك خصوصا ان الواحد مش ملتزم قوي وبالتالي ايمانياته ضعيفة وعرضة للقضاء عليها
دخلت المنتدى وقدت اراقب الحوار بين الاعضاء فترة قصيرة سرعان ما وجدت نفسي وسطهم وطبعا لظروف المنتدى اضطريت اني انقل معيشتي وعفشي هنا في المنتدى ده وكانت فكرة ذكية من حواء كايجاد حل لايواء من لا مأوى له

طبعا وجدت في المنتدى ما ينقصني ...اذا الم بي هم قمت بسرده فتجد الحلول والدعاء يتهافت عليك....عندك استفسار او طلب للنصيحة او حتى فرحة تحب تشارك بيها الناس تلاقي...كله موجود....والاهم من ده كله واللي خلاني متمسك بالمنتدى هي الروح الاسلامية او الدينية والاحترام التي يتمسك بها الاعضاء والتي تظهر في مشاركاتهم....لاني بشوف في بعض المنتديات مسخرة بمعنى كلمة مسخرة...وده طبعا لان اخويا مشرف في احد المواقع دي وحب يجرجرني معاه هناك بس انا ما حاولتش حتى لدرجة انه كان بيغريني بمنصب مشرف في منتديات كبيرة جدا ع النت ماحدش بيقدر يحصل فيها ع عضوية عادية حتى ....طبعا علشان ماحدش يفهم حاجة غلط هي منتديات عادية ولكن مش اسلامية وانما بيبقى فيها اختلاط ما بين الجنسين في التعامل ويتم رفع الافلام والاغاني والبرامج لتحقيق اعلى نقاط....المهم
دلوقتي الواحد شغال وطالع عينه كمان بس مابيفارقش المنتدى لانه لو سابه يحس ان في حاجة ناقصاه
اللي يضحك في ده كله....اني لما بدخل ع النت بدخل ع تلات مواقع بس وهي هذا المنتدى ومنتدى بني سويف والايميل بتاعي غير كده مابدخلش ....وحاسس باكتفاء ذاتي بالرغم من اني مشترك في حاجات كتيير زي الفيس بوك ومواقع من نفس النوع لكن ما بشاركش ولا بتابع فيها لانها لا تستهويني

وخللي ياأخت جنة الخلد موضوع انك بتفيدي وبتستفادي ده شئ بيجي مع الوقت واحيانا قارئ الموضوع هو سبب نجاح الموضوع وليس كاتبه او ناقله لان بتعليقه ونقاشه يعطي اهمية للموضوع .....بالاضافة ان ما ترينه من خبرة لبعض الاعضاء سواء في انتقاء المواضيع او طريقة السرد او الرد فهو وليد فترة قريبة مجرد البداية ثم الانطلاق....وطبعا نستثني من ذلك غاوي وحواء....وبالاخص غاوي لانه مخضرم وقديم في الموضوع ده

اديني قلت كتير وروني بقه مين اللي هيقول اكتر

انا احب انى اجعل ردى فى الاخر بس حبيت اعلق على اخى فى الله
الباشمهندس ان فيه منتديات كتيره محترمه وبتأدى نفس رسالة منتدانا الرائع
بالنسبه لاختى جنه انا احب جدا ان اقرا تعليقاتك للاستفاده و لخفة دمها الشديده

انا كنت كاتبه رد كبير خالص بس للاسف النت قطع وراح الرد غفله مني فقلت بصراحه قدر الله وماشاء فعل
خلاصه ردي الي ضاع:
انا لست متزوجه ولذلك فعندي وقت للدخول علي النت وانا تقريبا مش بدخل علي المنتدي ده ومنتدي اخر وبس هما تقريبا اللي لازما اول ماافتح الجهاز افتحهم ومش عارفه بصراحه ماسيحدث في المستقبل لاني مش عارفه ظروف البيت الذي سانتقل اليه هل سيكون به نت ولا لا ياسلام بقي لو كان زوج بلاب توب ونت فلاشه ماتقلقوش نخليها من مواصفات العريس علشان خاطر المنتدي
بس اكيد بامر الله حتي وان تزوجت هيبقي بيت ابي موجود الي ان اتردد عليه لان امارس حياتي مع النت لاني ممن يعتبر النت علاقات حقيقيه وليست خياليه لانها لو كانت خيال ماكنتش اشتركت اصلا لان اكيد استحاله نضيع وقتنا مع شخصيات خياليه لذلك انا بحب يكون العضو بيكون بيعبر عن نفسه في مواضيعه وردوده حتي لو بشكل بسيط من شخصيته ولكن لا يكون كذابا في عرض شخصيته لاني انا شخصياا ببقي واضعه في اعتباري انه شخصيه لها كيان حقيقي ووجود حقيقي ورغم ما شاهدته من كذب كثير علي النت الا اني مازلت علي مبدأي ولن اغيره بامر الله
اما عن الوقت المخصص فانا بصراحه بدخل النت بعد ماباجي من شغلي بس مش حاطه وقت محدد وباذن الله هيكون في الخطه الخمسينيه الجايه بامر الله ذلك القرار وهو التخطيط لوقتي في الدخول للنت

اقتباس :

ما جدوى التواجد و المشاركة في المنتديات ؟

اكيد الاستفاده والافاده طبعا ورب كلمه ......تكون سببا لدخولنا الجنه

اقتباس :

فهل أنت كموظف أو رب بيت ؟ .. ترى تواجدك في المنتديات أمر ذا أهمية
أم هو من نوافل الأعمال ؟

انا بشتغل بس مش متجوزه زي ماقولت بس اكيد هو المنتديات عندي من الامور الهامه وخصوصا انها في صميم شغلي لاني بوظفها بشكل يناسب شغلي

اقتباس :

هل تعتقد أن التواجد و المشاركة مضيعة للوقت أو هو باب من أبواب الاستفادة و الإفادة ؟

لاطبعا مش مضيعه للوقت ده استفاده كبيره بس الاهم اننا نجدد النيه عند الدخول وهو الاحساس هيفرق كتير

اقتباس :

هل لديك وقت محدد لدخول المنتديات بنظام ، أم الأمر يأتي صدفة و دون سابق عزم ..؟

سبق الرد بامر الله نخطط ونعزم صح

اقتباس :

هل ترى أنك قدمت شيئا من خلال المنتديات تحتسب أجره أم لا ؟ ،

الحمد الله ..اعتقد ان الكلمات ليست بكثرتها ولكنها بمدلولها
انا عن نفسي شخصيتي اتغيرت كتير بسبب منتدي ما جزاه الله عني خيرا كثيرا

اقتباس :

هل تعتقد أن عائق ضيق الوقت يؤثر على مساهمتك و تواجدك ؟

في الوقت الحالي اعتقد اني عندي وقت شويه للمنتدي رغم انشغالي بشغلي طبعا والواجبات الاخري اللي علي بس الحمد الله في وقت للمشاركه



في نهايه الامر اعرف اني اثقلت عليكم بردي ولكن ما اود ان اقوله انه ربما تقرأ موضوعا او تسمع اخر فيغير ذلك من اتجاهاتك وشخصيتك للافضل فاكيدبامر الله طالما هناك نيه صالحه وصدق عزم اكيد هتكون الاستفاده من المنتديات بصفه عامه ومنتدانا بصفه خاصه شئ جوهري واساسي
اترككم في حفظ الله ورعايته واقسم بالله اني احبكم في الله

مش عايزه افرض نفسى بس ليه بعض الاعضاء ما ردوش هل الموضوع مش مهم ولا ما فيش اجابات على فكره انا ما بزعلش من الرد الناقد يعنى لو حد رد وقال ان الموضوع ده مثلا ممل انا مش هازعل بس انا فى حالة تقييم لنفسى فالردود هتساعدنى كتير وخاصة انى اول مره اكتب واول مره اشارك فى منتدى واهدافى كلها لمرضاة الله وطبعا للاستفاده وقليل من التسليه000

اقتباس :

بس ليه بعض الاعضاء ما ردوش هل الموضوع

احب اقتبس رد حضرتك نفسه

اقتباس :

لكن مشاغل الحياة صرفتني عنه

بالنسبة ليا على الاقل فعلا مشاغل العمل وغير ان النت فاصل من عندى فى المنزل من شهرين تقريبا

وانا هاقتبس اسئلة حضرتك واجاوب عليها

ما جدوى التواجد و المشاركة في المنتديات ؟

على فكرة انا شايف ان الموضوع ده فى غاية الاهمية

لان اى شىء بفعله لابد او يكون له هدف مهما كان هذا الشىء والا كان مضيعه للوقت والجهد بلافائدة

وحتى الدخول على النت او المشاركة فى المنتديات لابد ان يكون له هدف

حتى لو كان ترفيه -------> لانه هدف فى حد ذاته ( روحو عن القلوب )


بالنسبة ليا انا اهدافى

1 - (استخدام الانترنت ) الدعوة الى الله والى ممارسة الاسلام كسلوك يومى واداب وممارسات وتطبيق دعوة الاسلام خلال حياتنا وليس فقط كعبادات


2 - اكتساب وتبادل الخبرات فى كل المجالات وده الحمد لله اتحقق واستفدت استفادة على مستواى الشخصى كبيرة جدااا من منتدى بنىسويف

منها غير المعلومات
* اداب الاختلاف ... لابد من الاختلاف ولكن لايجب ان يكون خلاف
البشر كلهم مختلفين الاخوات فى البيت لكل منهم شخصية وهو ابناء بيئة واحده وتربية واحده فيجب ان احترم غيرى واعترف بوجوب الاختلاف فى وجه النظر .

* اكتساب مهارات فى تحليل الشخصيات ( حسية - بصرية - سمعية )

* التوسط وعدم التعصب لوجه نظرى والموضعية فى الحوار ومعرفة ان من حق غيرى ان يتبنى وجه نظره مثلما احب انا ايضا ان اتبنى وجه نظرى

* مهارة الاقناع .. ازاى اقدر اقنع شخص بوجه نظرى او اوصل معاه للاتفاق على نقط اتفاق بينا


3 - اكتساب صدقات حقيقية والتعرف على اصدقاء جدد واخوة فعلا فى الله


فهل أنت كموظف أو رب بيت ؟ .. ترى تواجدك في المنتديات أمر ذا أهمية أم هو من نوافل الأعمال ؟

ذا اهمية باذن الله

، هل تعتقد أن التواجد و المشاركة مضيعة للوقت أو هو باب من أبواب الاستفادة و الإفادة ؟

جاوبت عليه من خلال نقطة تحديد الاهداف واهدافى من المشاركة

، هل لديك وقت محدد لدخول المنتديات بنظام ، أم الأمر يأتي صدفة و دون سابق عزم ..؟

للاسف غير منتظ فى هذة النقطة وليس لى وقت محدد ولكن هناك عزم على التواجد والمشاركة

هل ترى أنك قدمت شيئا من خلال المنتديات تحتسب أجره أم لا ؟ ،

باذن الله واتمنى ذلك

هل تعتقد أن عائق ضيق الوقت يؤثر على مساهمتك و تواجدك ؟

نعم وبشدة


وشكرا لك اختى على هذا الطرح

اقتباس :

مش عايزه افرض نفسى بس ليه بعض الاعضاء ما ردوش هل الموضوع مش مهم ولا ما فيش اجابات