كوكو من المريخ

كوكو من المريخ

بقلم د. أيمن الجندى


أشياء عجيبة لا تحدث إلا معى. مثل ذلك الراكب الجالس جوارى فى الميكروباص، والذى أخرج جهازا عجيب الشكل، ثم نظر فى حذر قبل أن يهمس قائلا:

- هنا كوكو، أنا فى مصر، وجارى البحث والتنقيب. ثم أغلق الجهاز وراح ينظر إلينا فى فضول، فتملكتنى رغبة صحفية رهيبة أن أعرف سر المسألة. تظاهرت بالنوم لكى يتكلم بحرية، وبالفعل وجدته يخرج الجهاز المريب ثم يهمس قائلا:

- هنا كوكو، على فكرة أنا دلوقت فى الميكروباص (قالها فى انفعال وفخر وكأنه يقوم بمغامرة لا نظير لها.. عمل خطير لا شك أنه يثير إعجاب من يستمعون إليه فى الجانب الآخر).

فى هذه الأثناء كان الميكروباص يفرغ حمولته ويمتلئ عشرات المرات، وبرغم أن محطتى جاءت منذ زمن، فإن رغبتى فى استجلاء السر دفعتنى إلى تأجيل النزول.

راح يرنو إلى الشارع المزدحم من خلال نافذة الميكروباص مدققا، ثم فتح الجهاز للمرة الثالثة:

- هنا كوكو، لا يوجد أثر حتى الآن لسكان كوكب الزهرة.

عند هذا الحد لم أطق صبرا، فملت عليه قائلاً: هو إيه حكايتك بالضبط؟، كل شوية تطلع جهاز غريب وتقول: هنا كوكو، هنا كوكو، إيه الموضوع يا أخينا؟

(نظر حوله فى حذر ثم قال بلهجة عاطفية لا مبرر لها أبدا) شوف أنا ارتحت لك من أول نظرة وحبيتك، وحقولك كل حاجة..بس فيك من يكتم السر؟

-فى بير (قلت له مطمئنا)

- أنا كوكو من المريخ (قال وهو يمد يده مصافحا)

- ومحسوبك أيمن من الأرض. بس ما تآخذنيش حضرتك شكلك زينا ومش باين عليك أبدا إنك من المريخ أبدا!

- (فبدا وكأننى أصبته فى مقتل لأنه قلب شفتيه فى حزن كالأطفال) ما هى دى المشكلة. اضطريت اتنكر فى شكلكم، مع إن شكلى الحقيقى جميل جدا، وشى أخضر، وعينيا فى وسط صدرى وودانى فى ركبتى، حتى شوف!!

وفجأة وجدته قد تجسد كما وصف نفسه بالضبط. يا للهول! هذا الرجل كلامه صحيح. إنه قادم بالفعل من المريخ!!.

- (قال فى فخر بعد أن عاد إلى شكله الآدمى): بذمتك شفت حلاوة زى كده!. مش لهم حق بنات المريخ يموتوا فيا؟

- (قلت وأنا أتمالك نفسى بصعوبة): يا بختك يا سى كوكو، عقبالى.

- (قال وهو يتأمل وجهى برثاء): بصراحة صعب يا أيمن. مش حاكدب عليك، مناخيرك كبيرة.

- ( قلت وأنا أدارى أنفى بيدى): سيبك من مناخيرى يا سى كوكو وقل لى: إنت جاى تعمل إيه فى كوكب الأرض؟ (غداً ستنكشف المفاجأة المذهلة).

أنا مضطر اسفا اني اكمل الموضوع كله النهاردة واحرق عليكم متعة الانتظار علشان شكلي كده بكرة مش هالحق ادخل

زوزو من الزهرة

بقلم د. أيمن الجندى ١٦/ ٢/ ٢٠١٠
الوضع كما يلى: المرح يسود الميكروباص، كوكو يرمق فرحتنا فى دهشة، سيدة لا تشارك فى الاحتفال وقد بدا عليها الغضب الشديد. ثم تصرخ طالبة بأن يتوقف هذا الهُراء.

ليه يا مدام؟ (قلت لها متسائلاً)

قالت بصوت غاضب:

أنا مش موافقة على التهريج اللى بيحصل ده.

وحضرتك بتتكلمى بصفة إيه يا مدام ( قلت متفلسفا) ما هى الناس مبسوطة قدامك أهه!.

وهنا حدثت المفاجأة المذهلة. وجدنا السيدة تتلاشى ثم تتحول إلى حورية شديدة الجمال لا نظير لها على كوكب الأرض. ساد الصمت الذاهل لثوان ثم قطعته الفاتنة بقولها:

أقدم لكم نفسى: زوزو من الزهرة.

وعلى الفور بدأت الطبول ترن فى أيدى الركاب، ولكن بنداء مختلف:

زوزو.. زوزو.

فانحنت الحورية فى حركات استعراضية، وأرسلت القبلات فى الهواء لركاب الميكروباص وقالت:

قولوا ورايا: فليسقط المريخ.

(ركاب الميكروباص وقد انقلبوا على كوكو) فليسقط المريخ

الزهرة يعيش، الزهرة يعيش، كوكب المريخ ما يلزمنيش

الزهرة يعيش، الزهرة يعيش، كوكب المريخ ما يلزمنيش

(كوكو مذكرا) يا جماعة الأكل.. السجاير.

(ينقلب الهتاف فورا) كوكو.. كوكو.. مريخ.. مريخ

تقول زوزو بصوت عال:

الزهرة حتديكم أنابيب البوتاجاز ببلاش.

(تدوى الطبول) زوزو، زهرة.

(كوكو) قرارات علاج على نفقة المريخ؟

(تدوى الطبول) كوكو.. مريخ.

(زوزو) حفلات مجانية لأليسا ونانسى وهيفاء.

(هياج فظيع) هييييييييييه خلى بالك من زوزو.

(كوكو يقترب من زوزو قائلا) بأقولك إيه ما تسيبك من المجانين دول، دول عالم ما ينضمنوش. وشايلين الطبول حتى وهم رايحين الشغل، وبيصقفوا لأى حد.

(زوزو فى حيرة) والله عندك حق. أنا مستغربة من اللى بيحصل هنا.

ما تيجى نعقد صلح بين المريخ والزهرة ونخلع من الكوكب الملعون ده خالص؟.

(نظرت إليه فى دلال) تتجوزنى؟.

(كوكو يفتح اللاسلكى) أوقفوا الغزو.. الناس هنا مالهمش نظام ومش مضمونين، وأوقفوا الحرب مع الزهرة كمان، إحنا خلاص اتصالحنا (يقذف باللاسلكى من النافذة ويلتفت إلى زوزو قائلا) أموت أنا.

(ركاب الميكروباص يغنون فى سعادة فائقة وقد نسوا الأمر برمته) اتمخطرى يا حلوة يا زينة، يا وردة من جوه جنينة.

وتنطلق عربة الأصوات بالسعداء الذين يصفقون لأى شىء وكل شىء، وتستمر الحياة فى مصر على دقات الطبول كالمعتاد.