هام جدا لربات البيوت

كل سنة وانتم طيبين يا متحابين ويا متحابات
بما اننا ف الشهر الكريم وحملة التنضيف بدات وده طبعا مع العبادة حبيت اقول لكم على حاجة رهيبه جدا مكنتش متوقعاهاولسه مكتشفاها واكيد فى منكم عارفاها هى
( ملح الليمون ) مادة شكلها قريب من الملح بس خشن شويه المادة دى رهيبة
كنت بسمع عن فاعليته ومكنتش مصدقة لغاية ما جربته بنفسى ف التنضيف - كان عندى براد استانلس وغالى اتحرق منى تماما ومكنتش بستعمله وقلت اجرب فيه طالما هو كده كده باظ وجبت شويه ميه ولما غليت حطيت معلقة ملح ليمون ومعلقتين خل وسيبته يغلى 10 دقايق - وبعد كده دعكته فوجئت بالطبقة السودا الداخليه بتبرق بمنتهى السهولة ومن اول دعكه - والله رجع كانه جديد وبيبرق - قلت لازم ولابد افيد اخواتى هنا عشان يدعولى ولسه هجربه ف السيراميك اللى عند البوتجاز وارد عليكم بس انا متوقعه النتيجة
ده غير انه مش مؤذى خالص وبيتحط ع الاكل كمان
هو بيلسع الايد لو فيها جرح زى الملح العادى بس مالهوش اضرار نهائى
وجربته ف الغسيل الابيض طلع قشطة
الكيلو منه ب 8 جنيه انا جبت بصراحه ربع كيلو م العطار كنت خايفة يطلع اى كلام
لكن بعد التجربة انا عاوزة بالشوال
يلا جربوا وابداوا معايا حملة التنضيف وكل واحدة تدخل تقولى عملت ايه من عبادة ومن تنضيف - ومفيش مانع ان الرجاله المتحابون هنا يساعدوا زوجاتهم او امهاتهم ويجربوا الحاجات دى بس يدعولى
يلا سلام عشان ادخل ع السيراميك

جزاكم الله خيرا كثيرا يا جنة وربنا يجعله فى ميزان حسناتك
هو انا خلصت تنظيف قبل رمضان عشان افضى نفسى ودماغى من الوش ده وعلى العيد التنظيف هيكون بسيط
بعد العيد هجرب الفكرة بتاعتك وهقولك ان شاء الله

ترويق وتنضيف وغسيل لينا الجنة ان شاء الله

فى خلطة تانى يا جنة( نشادر وخل وماء )لتنضيف الدهون والسراميك

ادينا بنجرب

وفعلا خلطتك جربتها فى البراد ونفعت

جزاكى الله خيرا

اقتباس :

هو انا خلصت تنظيف قبل رمضان عشان افضى نفسى ودماغى من الوش ده وعلى العيد التنظيف هيكون بسيط

والله انتى ميه ميه ريحتى نفسك بس بصراحه انا مش بحس بالعيد غير لما بروق لغايه اخر يوم دقة قديمه بقى

اقتباس :

وفعلا خلطتك جربتها فى البراد ونفعت

جزاكى الله خيرا

طب الحمد لله - بس انا مجربتش النشادر انا بحط بداله ملح الليمون - وعلى فكرة لو عملنا بمية وخل بس برضو بينضف بس الملح بيسهل الامر لما بتيجى تدعكى بالسلك بيطلع اسرع
وربنا المعين

طب ما بدل ارشاداتك الغاليه دى
تيجى تشمرى وايدك معانا ولا هو كلام وبس هديكى براد وتثبتلنا عمليا وهديكى الشفاط كمان وخلى المواعين عليا

اقتباس :

طب ما بدل ارشاداتك الغاليه دى
تيجى تشمرى وايدك معانا ولا هو كلام وبس هديكى براد وتثبتلنا عمليا وهديكى الشفاط كمان وخلى المواعين عليا

قومى يا بت يا زرقاء بلاش كسل دا الواحد ف سنك كان بيشيل الحيطان شيل م التنضيف جيل اخر زمن

بمناسبة الشفاط يا جماعه هاتو سلك مواعين وحتة صابونة ريحة قديمه وادعكوا الشفاط وادعولى - على فكرة خلعه وتركيبه سهل لحسن انا كنت فاكرة انى لو شيلت الشفاط مش هعرف اركبه طلع عيل ف كى جى ون يعمله

يعنى محدش رد عليا وقالى نضف ايه ؟ ولا كل الناس منضفة من زمان الا انا